حكاية 3 آباء حوامل: هل كانت تجربة ممتعة؟

 "تعرفي معاناة الحمل، آه..عشتيها، لأ.. يبقي متعرفيهاش"

أعتقد ده لسان حال كل حامل، أو كل أم مرّت بتجربة الحمل.. الممتعة المرهقة المعجزة!
لكن، يبدو إن في بعض الرجال قرروا يخوضوا التجربة بالفعل تكريمًا لزوجاتهم وأمهاتهم في عيد الأم، 3 رجال آباء في منتصف الأربعينات، ستيف جونز ، جوني بيجينز و جيسون براملي ، في يوم عيد الأم إللي بيوافق 15 مارس في بريطانيا  الـ3 آباء خاضوا تجربة مثيرة بارتداء بدلة وزنها 15 كيلو بتنقل إحساس السيدة الحامل -أو بتنقل الإحساس قدر الإمكان بتجربة الحمل-. ودخلوا تحدي في قوة تحملهم لفترة ارتداء البدلة -الاختبار-.
تفتكروا إيه اللي حصل؟
كل أب منهم عنده أطفال بالفعل، وكل أب منهم كان بيدون وبيكتب تجربته يوم بيوم مع البدلة الحامل، البدلة زي ما في الصور مصممة بحيث تماثل جسد السيدة الحامل في شهور الحمل المختلفة.
كان مسموح لهم فقط بقلع البدلة لمدة 15 دقيقة أثناء الاستحمام لا أكثر.. ومع إن بدلة الحمل كانت بتنقل فقط أعراض زيّ الثقل، صعوبة التنفس، صعوبة الحركة والمزاج السيئ والصداع، صعوبة التنقل والقيام بأبسط الأعمال زي ربط الحذاء أو دخول الحمام بسهولة أو المشي للعمل كام دقيقة.. لكن كان رد الـ3 آياء بعد 3 أيام فقط من التجربة هو:
"لقد كانت تجربة صعبة..صعبة جدًا" ومع ذلك أكتر واحد صمد في التجربة كان لمدة 12 يوم فقط.
 
الآباء الـ3 كانوا بيدونوا تجاربهم على موقع Three Pregnant Dads.
وكانت دايمًا تساؤلاتهم إزاي الستات الحوامل بتقدر تستحمل كل التعب ده، تعب بالليل وتعب بالنهار وكل أوقات اليوم طوال 9 شهور كاملة! خصوصًا بعد اختبار -بسيط- لشعور الحامل نظريًا، بدون المرور الفعلي بتغير الهرمونات وضغط الدم وتجربة الولادة..وما أدراكم ما تجربة الولادة.
 
تجربة مثيرة مش كدة؟ تجربة في أخرها وجه الثلاثة آباء رسالة للعالم بتقول " تحية وتقدير عظيم لكل أم وكل حامل على المعاناة اللي بتمر بيها". الأمهات بتصنع معجزات.